Vil læreplanen bidra til danning av elevane?

Abstract

Danning har lenge vore ein sentral del av skulen sitt føremål og har også ein sentral plass i den siste læreplanen, Kunnskapsløftet 2020 (LK20). Eg argumenterer for at danningsoppdraget likevel vanskeleg lèt seg løyse innafor rammene læreplanen set, og gir to grunnar for dette: For det første viser eg at danningsoppdraget er for utydeleg definert i læreplanen. Der utdanningsoppdraget blir klarlagt gjennom grundige utgreiingar av omgrepet kompetanse, blir omgrepet danning knapt drøfta i det heile. Den andre grunnen er LK20 si kopling mellom danning og kompetanse. I artikkelen viser eg at danning og kompetanse er ulike former for kunnskap. Forenkla kan skilnaden skildrast slik: Kunnskap gir kompetanse når han gjer vår indre og ytre verd objektivt forståeleg og handterbar. Kunnskap er dannande når han gjer normative eller moralske aspekt ved verda forståelege. I forholdet til naturen, til dømes, er kunnskap dannande når han gjer naturen sin verdi og subjektive betydning synleg. Naturen blir her erfart som noko normativt, som noko som held oss ansvarleg og gir livet ei retning. Skilnaden mellom danning og kompetanse gjer at danningsoppdraget vanskeleg kan løysast gjennom det kompetanseorienterte rammeverket LK20 legg til grunn.

Keywords

• danning
• kompetanse
• kunnskapsløftet 2020 (lk20)
• kritisk tenking
• ansvar