گۆڤارا زانستێن مرۆڤایەتی یا زانكۆیا زاخۆ (Dec 2019)
پرسێن جڤاكى ژ گۆشه‌نیگایێن ڕه‌خنا جڤاكی د كورتیله چیروكا (عشق)ا (خالد عه‌لى سلێڤانه‌ی)یدا
Abstract
جڤاك وه‌ك پێكهاته‌كا لێكدایى ژ كومه‌كا كه‌سان، هه‌رده‌م هه‌م ب تاكى كاریگه‌ر بوویه و هه‌م كاریگه‌رى ل تاكى كریه؛ له‌وڕا ب لێنێرَین ل جڤاكى، دێ بینین كو جڤاك لێكدانه‌كه ژ كومه‌كا دیارده و داب و نه‌ریتێن وان تاك و كۆمێن دناڤ جڤاكیدا دژین و جڤاك لگۆره‌ى وان دیارده و داب و نه‌ریتان دهێنه پێناسه‌كرن؛ له‌وڕا ب لێنێڕین ل ده‌قان، ئه‌ڤ چه‌نده ب دروستى بۆ مه ڕوهن دبیت كو جڤاك د كیژ دۆخیدا دژیت. ئه‌ڤ ڤه‌كۆلینه ل ژێر ناڤونیشانێ (پرسێن جڤاكى ژ گۆشه‌نیگایێن ڕه‌خنا جڤاكی د كورتیله چیروكا (عشق)ا (خالد عه‌لى سلێڤانه‌ی)یدا) هاتیه به‌رهه‌ڤكرن و ئارمانجا سه‌ره‌كیا ڤێ ڤه‌كۆلینێ ئه‌وه كو لدویڤ ڕه‌خنا جڤاكى، هزرێن ڤه‌شارتیێن پشت وان په‌یڤ و ده‌سته‌واژان بگه‌ڕیێت و په‌یام و ئارمانجێن نڤیسه‌رى دیار بكه‌ت و ژ وێ گرنگتر كو گریمانا سه‌ره‌كیا ڤێ ڤه‌كۆلینێیه، ئه‌وه كو ئایا نڤیسه‌رى ئه‌و په‌یام ل پشت وان په‌یڤ و ده‌سته‌واژه‌یاندا ڤه‌شارتینه؟ و ئایا چه‌ند شێواز ژ بۆ گه‌هاندنا هزرا خوه بكار هیناینه؟ و ئایا بوویه تاكه‌كێ جڤاكیێ ساخله‌م و هه‌ست ب خه‌م و ئێش و ئازارێن جڤاكێ خوه كرینه؟ و گه‌له‌ك پرسیارێن دیتر كو د سه‌رجه‌مێ ڤه‌كۆلینێدا، به‌رسڤ لسه‌ر دهێنه دان. ئه‌گه‌ر وه‌ك ڕێباز به‌رێ خوه بده‌ینه به‌هرا پتریا ده‌قێن نویێن په‌خشانى، كو خوه د چارچووڤێ (چیرۆك، كورته چیرۆك، كورتیله چیرۆك و چیرۆكێن پڕكورت)دا دبیننه‌ڤه، دچنه د چارچووڤێ ڕێبازا ڕیالیزمیدا و هه‌ر ژ به‌ر هندێ ژى نڤیسه‌ر، ڕاسته‌وخۆ دچیته د ناخێ جڤاكیدا و هه‌ر بوویه‌ره‌كا سه‌رنجڕاكێش، دلته‌زین یان ب خه‌م و كوڤان بیت، یا خود دیارده‌ك ژ دیاردێن جڤاكى بیت، یێ كریه كه‌ره‌سته بۆ به‌رهه‌مێ خوه و بڤێ چه‌ندێ هه‌م ئه‌و خه‌م هاتیه باسكرن و هه‌م ڕاسته‌وخۆ یان ناراسته‌وخۆ هاتیه ڕه‌خنه‌كرن و هه‌م جۆره ئه‌ده‌بیه‌ته‌ك تێدا هاتیه بكارهینان كو خوینه‌ر چێژێ ژێ وه‌ربگریت و هه‌م لدویماهیكێ گشت ئه‌ڤ كاره ژ بۆ هشیاریا كۆمه‌لاتى دهێنه ئه‌نجامدان. لێ ڕێژا كاریگه‌رى و كارتێكرنا وان به‌رهه‌مان لسه‌ر خوینه‌رى چه‌نده و كۆمه‌لگه‌ه چه‌ند مفاى ژێ وه‌ردگریت ژى په‌یوه‌سته ب ڕێژا تێگه‌هشتنا تاكێن كۆمه‌لگه‌هى و ڕێژا خوینه‌رێن وێ و بیرمه‌ندیا وان.
Keywords
