Stjórnmál og Stjórnsýsla (Dec 2009)
Stigmögnun skuldbindingar: Þættir í ákvörðunarfræði
Abstract
Greinin fjallar um og varpar ljósi á hugtakið "stigmögnun skuldbindingar". Hugtakið er notað innan ákvörðunarfræða, en það er fræðigrein þar sem fjallað er um með hvaða hætti einstaklingar og hópar taka ákvarðanir. "Stigmögnun skuldbindingar" vísar til þess að stjórnendur og aðrir þeir sem taka ákvarðanir halda áfram að fylgja eftir verkefnum eftir að þeir hafa áttað sig á að þeir tóku ranga ákvörðun. Ástæður fyrir því að þetta gerist eru þessar helstar: 1) sinnuleysi varðandi kostnað, 2) dýrkeypt að hætta við ákvörðun (sálfræðilegt, félagslegt eða starfstengt áfall!), eða 3) að ávinningur geti verið mikill ef vel tekst til með ákvörðun. Það má skapa mótvægi við því að atburðarás í "stigmögnun skuldbindingar" fari af stað með því að skoða fórnarkostnað sem þegar er orðinn, skapa andrúmsloft til breytinga, vera tilbúinn að meta afleiðingar á gagnrýninn hátt og forðast hóphugsun. "Stigmögnun skuldbindingar" hefur í mörgum tilfellum valdið gífurlegu tjóni og því mikilvægt fyrir stjórnendur að lágmarka hættu á að falla í þessa gildru.
